Abenduaren 24an, Gabon gaua ospatzeaz gainera, euskaldunek Olentzero hartzen dute tradizioz. Olentzero ikazkina da, eta egun horretan, menditik jaisten da gauez etxeetan jostailuak eta opariak banatzera. Figura horren inguruan, zenbait ekitaldi egiten dira Euskal Herrian. Hondarribian, auzo-elkarteak, kultur elkarteak, abesbatzak, ikastetxeak, lagun-taldeak, eta abar biltzen dira egun horretan, hirian barrena kantari ibiltzeko. Era berean, Gipuzkoa plazan, Olentzero Kantu Jaialdia egiten da. Olentzero bera ere etortzen da Hondarribiko kaleetara.